3. Workshop "Platt in'n Kinnergoorn" am 23. Oktober 2019 in Salzhausen

In'n Oktober drept sik Optrecker op Inladen vun den Lümborgschen Landschapsverband to jümehr Fortbillen "Platt in'n Kinnergoorn". Düt Johr sünd wi to Gast in Soltzhuusen. Dor hebbt se in dat "Haus des Gastes" dat plattdüütsche Zentrum vun'n Landkreis Harborg inricht.

Veer Referentinnen mit ganz veel ünnerscheedlich Ideen wüllt de Deelnehmers Moot maken, in'n Kinnergoorn ok mal Platt to snacken, mit de Kinner op Platt to singen or plattdüütsche Böker vörtolesen.

Ut Greifswald kaamt Dr. Birthe Arendt un Ulrike Stern. De beiden geevt en Inblick, wo ganz lüütje Kinner Spraken lehrt un wo Plattdüütsch as "Brückenspraak" bruukt warrn kann. Butendem müchen de Referentinnen Raatslääg to "Plattdüütsch-Vermittlung" in'n Kinnergoorn geven.

In jümehr Workshop stellt se en druckfrisch Kinnerbook vör un verkloort, wo een mit en Kamishibai arbeiden kann.

Inge Brackelmann un Silke Bruns müchen in den tweeten Workshop bannig veel Ideen ut jümehr Plattdüütsch-Arbeit in'n Kinnergoorn vörstellen. Jümehr Motto is "Tro Di dat!": eenfach mal anfangen mit "Platt in'n Kinnergoorn"!

Butendem sünd all Deelnehmers vun Harten inlaadt plattdüütsche Böker und Speelsaken mittobringen, mit de se ganz besünners giern arbeiden doot.

Anmellen kann een sik bit to'n 15. Oktober 2019. Schullen dor to veel Anmellen ween, mööt wi leider de Lüüd afseggen, de sik eerst laat anmellt hebbt.

De Inladen und de Zeddel to'n Anmellen kann een hier rünnerladen:

Inladen

Zeddel to'n Anmellen

Plakette zur Auszeichnung/Kennzeichnung von Kindergärten mit plattdeutschen Angeboten im Verbandsgebiet des Lüneburgischen Landschaftsverbandes © Lüneburgischer Landschaftsverband, Entwurf Volker Butenschön