19. Schoolmesterdag 2020 - Dit Johr is allens anners!

Nu geiht dat in den Harvst un normalerwies steiht an den letzt Dünnersdag vör de Harvstferien de Schoolmesterdag op dat Programm vun haupt- un ehrenamtlich Schoolmesters in uns Region. Dit Johr is allens anners un wi all tosamen sett uns jümmers noch düchtig mit Corona utenanner. Dorüm finnt de Schoolmesterdag nu nich so statt, as wi dat all kennen doot.

De 19. Schoolmesterdag 2020 finnt online statt. Wi wüllt dat mit dat Programm "Zoom" maken un freit uns, wenn bannig veel Plattsnacker mitmaken doot. An'n Dünnersdag, 08. Oktober 2020, wüllt wi vun Klock twee bit Klock halvig veer namiddaags op un över Plattdüütsch snacken.

Hier kann een de hochdüütsche Inladen un dat Programm finnen. Butendem steiht dor ok, wo een sik per E-Mail bit to'n 25. September 2020 anmellen kann.

Rückblick: 18. Schoolmesterdag in Winsen/Luhe

2019 harr de Lümborgsche Landschapsverband to'n Schoolmesterdag na Winsen/Luhe inladt. Woneem freuher de Peer vun Herzogin Dorothea stahn hebbt. dor is hüüt en Museum un en groten Ruum för Dagforten or kulturelle Veranstalten. An'n 26. September hebbt sik dor üm un bi 50 Schoolmesters un anner Lüüd, de sik för Platt in de School intressert, drapen.

Na dat Begröten dör Uwe Harden, den Vertreder vun'n Landrat, un de Plattdüütsch-Referentin vun'n Lümborgschen Landschapsverband, Inga Seba-Eichert, gäv dat in ünnerscheedlich Warksteden fachlich Anregen to Plattdüütsch un Region in'n Ünnericht.

Marlene Bucher vun de Musikschool Emsland hett mit veel Musik un lüttje Spelen för de Grundschool ornig Stimmung maakt. In de tweete Warksteed hett Peer-Marten Scheller verkloort, wo dat mit dat Urheberrecht utsüht, wenn een fremde Texten eenfach kopiert or öffentlich vördriggt. Mancheen sünd dorbi de Ogen düchtig opgahn.

In twee Vördrääg hett sik de Grupp namiddags mit de Kultur in de Winsener Masch utenanner sett. Reinhard Gräler, de Kantor vun St. Marien, hett över den "Dialekt" vun sien Orgel snackt un denn ok noch en beindruckend Hörproov geven. Dat letzt Woort harr denn de Kustodin vun dat Museum in'n Marstall, Ilona Johannsen. Se weet veel to vertellen över Maiblomen, Diekbo, Stickeree un de Traditschoon vun de Drachten in de Winsener Masch.

De Schoolmesterdag finnt jümmers in Tosamenarbeit mit de Lannesschoolbehöörd statt. Dit Johr hett Wiebke Erdtmann uns bannig ünner de Arms grepen. Un ganz wichtig is, dat blangenbi jümmers Tiet noog is to'n Uttusch mit anner Schoolmesters.

Die Teilnehmer und Teilnehmerinnen eröffneten den Schoolmesterdag gemeinsam mit dem stellvertretenden Landrat Uwe Harden mit plattdeutschen Liedern, begleitet und dirigiert von der Musikpädagogin Marlene Bucher. Foto © Landkreis Harburg

Veranstaltungsort 2019: Museum im Marstall in Winsen/Luhe © Inga Seba-Eichert

Skulpturengruppe "Die Goldene Gans" auf dem Schlossplatz in Winsen/Luhe © Inga Seba-Eichert