21. Schoolmesterdag 2022 in Neuenkirchen

Söss Johr is dat her, dat de Schoolmesterdag vun'n Lümborgschen Landschapsverband in'n Landkreis Heidekreis stattfunnen hett. An'n 13. Oktober 2022 schall dat nu na Neuenkirchen in'n Heidekreis gahn. Mit dorbi sünd Landrat Grote, Gabriele Scheel (Schulfachliche Dezernentin RLSB), Wiebke Erdtmann (Beratersche för de Region un de Spraken), Kai Lührs (Plattdüütschbeopdragte Landkreis Lümborg), Christianne Nölting (Lännerzentrum för Nedderdüütsch) un de Referentin för Nedderdüütsch vun'n Lümborgschen Landschapsverband, Inga Seba-Eichert. Butendem stellt uns Bettina von Dziembowski un Monika Zimmermann (Kunstverein & Stiftung Springhornhof) jümehr Wark vör.

Dat Programm kann een hier nalesen. Anmellen kann een sik mit dit Formular bit to'n 3. Oktober 2022.

De Lümborgsche Landschapsverband informeert all Deelnehmers na den Anmeldeschluss per E-Mail över de "zum Zeitpunkt der Veranstaltung in Niedersachsen gültigen Maßnahmen zur Eindämmung der Corona-Pandemie".

Rückblick: 20. Schoolmesterdag in Bleckede 2021

Dat geev bannig veel to vertellen, as an'n 14. Oktober üm un bi 60 Lüüd, de sik all för Plattdüütsch insetten doot, in't Veranstaltungszentrum Bleckeder Haus tosamen keumen. De Lümborgsche Landschapsverband harr to'n Schoolmesterdag inlaadt un blangenbi en lütt Fierstünn op de Been stellt. 20 Johr Schoolmesterdag, dat bedüüd 20 Johr Netwarken för de plattdüütsche Spraak.

Den Optakt hett de Band Marie Diot maakt. De jungen Lüüd hebbt 2019 den plattdüütschen Band-Wettstriet Plattsounds wunnen. Se hebbt in Bleckede egen Texten op Platt sungen un dörför bannig groden Bifall kregen.

Landrat Jens Böther un Schoolamts-Dezernentin Gabriele Scheel sünd na Bleckede kamen un hebbt de Deelnehmers willkamen heten. Butendem hebbt se över de Bedüden vun de Plattdüütschförderung snackt, so as se dat beleven doot.

För sien Plattdüütsch-Engagement, wiet över de Grenzen vun'n Landkreis Lümborg weg, is Günther Wagener al uttekent woorn. In sien Vördrag hett e trüch keken op den Anfang vun de Plattdüütschförderung in Neddersassen un de Schoolmesterdag ut de letzten 20 Johr. Faken is he dorbi ween.

De Lümborgsche Landschapsverband schafft mit den Schoolmesterdag ok en Tosamenhang twüschen Spraak un Region. Dit Johr hebbt de Deelnehmers dorför dat Biosphärium in't ElbSchloss Bleckede besöcht un veel över de Natur un de Deerten in't Biosphärenreservat Niedersächsische Elbtalaue to weten kregen.

In't letzt Schooljohr is Plattdüütsch, wegen de Pandemie, in'n Ünnerricht bannig kort kamen. Nu hebbt wi all de Lüüd, de in de School Plattdüütsch lehren doot, Moot maakt, weer mit Plattdüütsch antofangen. De Deelnehmers kunnen ut dree Workshops utwählen, de op de ünnerscheedlich Intressen utricht weren. De Schoolmesterschen Urte Gehrckens-Gärtner, Heike Hiestermann un Wiebke Erdtmann harrn sik dorför rüst, Nele Ohlsen is online dorbi ween.

Bi Kaffee un Koken geev dat to'n Afsluss en Utblick op de Veranstalten "Platt in'n Kinnergoorn", "NoordNoordOost" un "Actionbound", so as ok op de nee'e Kooperatschoon mit de "Heide-Wendland-Filmklappe".