21. Schoolmesterdag in Neuenkirchen
An'n 13. Oktober 2022 is Neuenkirchen in'n Heidekreis dat Ziel vun üm un bi 45 Lüüd ween, de sik all för Plattdüütsch in de School insetten doot. Dat Team vun'n Schroershoff harr allens wunnerbor trech maakt, so dat de Lüüd al vör dat Begröten bi en Tass Kaffe veel mitnanner snacken kunnen. O Platt hett de Stellvertretersch vun'n Landrat, Tatjana Bautsch, de richtigen Wöör funnen un all Lüüd willkamen heten. Schoolamts-Dezernentin Gabriele Scheel is al bi de meisten Deelnehmers bekannt, denn se kummt siet 2019 na'n Schoolmesterdag un hett denn jümmers de richtigen Wöör praat.
De Lümborgsche Landschapsverband schafft mit den Schoolmesterdag ok en Tosamenhang twüschen Spraak un Region. Dit Johr hebbt de Deelnehmers Kunstvereen & Stiftung Hof Springhornhof besöcht. Bettina von Dziembowski un Monika Zimmermann hebbt in twee Gruppen dat Gesamtwark un utwählte Kunst in de Landschap vörstellt. Dat weer en ganz besünners intressanten Rundgang, bi den de Deelnehmers sik mit verscheden Objekten un jümehr Geschicht uteenanner sett hebbt.
Na dat Middageten harrn wi unverwohrens Besöök vun'n NDR. Werner Momsen weer mit sien Team na Neuenkirchen kamen un wull mal kieken, wat man bi so'n Schoolmesterdag allens beleven und lihren kann. En beten opgeregt sünd wi ween, denn en Workshop vör de Kamera un denn ok noch een dorbi, de manchmal dortwüschen snacken deit, dat harrn wi bi'n Schoolmesterdag noch nie. Aver dat kann een glöven: Interview un de Klönsnack mit em hebbt bannig veel Spaaß maakt.
Werner Momsen hett sik över dat Kerncurriculum in dat Schoolfack Düütsch informeert. Butendem hett he sik freit, denn in den annern Workshop güng dat üm Comedy op Platt. He hett seker noch den een or annern Tipp dorlaten. An'n 30. Oktober kann jeedeen den Bidrag op NDR-Fernsehen kieken.
To'n nakieken in de ARD-Mediathek:
Beitrag zum Schoolmesterdag bei "De Noorden op Platt"
Sendetermin: NDR, 30.10.2022, 11:30 Uhr, "De Noorden op Platt". Der Beitrag beginnt bei ca. 12 Minuten 49 Sekunden.
Bi Kaffe un Koken geev dat to'n Afsluss en Blick op de Arbeit vun dat Lännerzentrum för Nedderdüütsch. Christianne Nölting harr bannig veel to vertellen un achteran to verdelen. De letzte veertel Stünn hebbt Wiebke Erdtmann un Inga Seba-Eichert nutzt un kort trüch un denn wiet na vörn keken. Dor is al bannig veel Plattdüütsch plaant: in'n November 2022 staht de Veranstalten "Platt in'n Kinnergoorn" un "NoordNoordOost" sowie "Plattsounds" in'n Kalenner. De "Heide-Wendland-Filmklappe" un de plattdüütsche Leeswettstriet sünd denn in 2023 op de Agenda vun Platt in de School.
2023 finnt de Schoolmesterdag an'n 12. Oktober statt. Laat Jo överraschen, woneem de Dag denn stattfinnen deit.
